Sun, 23 Feb 2020

Tagalog News: Sec. Dar, hinikayat ang mga millennial sa agrikultura

Philippine Information Agency
25 Jan 2020, 00:38 GMT+10

SAN JOSE, Occidental Mindoro, Enero 24 (PIA) - Hinimok ni Department of Agriculture (DA) Secretary William Dar ang mga kabataan, partikular ang mga millennial, na subukang pasukin ang agrikultura at agri-business, sa kanyang pagdalo sa Provincial Agro-Fishery Summit sa Sikatuna Beach Hotel, San Jose kamakailan.

Sinabi ng Kalihim na napapanahon nang bumalik sa kanayunan ang mga kabataan dahil patuloy na tumatanda ang mga nasa sektor ng pagsasaka. Bilang patunay aniya na seryoso ang pamahalaan na ma-engganyo ang mga millennial, tatlong programa ang pinasimulan ng DA para sa mga ito.

Una, ayon sa opisyal, naglaan ang ahensya ng kalahating bilyong piso upang pondohan ang proyekto ng mga kabataan na makakalikha ng produkto na may potensyal sa agri-fishery business. Ayon kay Dar, sa ilalim nito, P500,000 grant ang maaaring makuha ng mga kabataan na magagamit sa product development, panimulang kapital, at iba pa . Aniya, pakikiusapan din ng Kagawaran ang mga lokal na unibersidad at kolehiyo upang tumulong sa aspeto ng dagdag-kaalaman at kasanayan na mahalaga sa implementasyon ng nasabing programa.

"Second program is open to those aged 18-30 years old (Ang ikalawang programa ay para sa mga may edad na 18-30 taong gulang)," saad ni Dar. Ito aniya ay pautang na hanggang kalahating milyong piso at babayaran sa loob ng limang taon ng walang interes. "Ang tawag dito ay Youth Agripreneurship Loan Program (YALP) na sadyang laan sa mga millennial na may interes sa pagsasaka o negosyong may kaugnayan dito," paliwanag ng Kalhim.

Ang ikatlong programa naman ay ukol sa mga may karanasan sa pagsasaka o kaya ay nakapagsimula na sa agri-business. "Sakaling gusto niya na palakihin ang kanyang existing na negosyo, maaari siyang makahiram ng hanggang P15 milyon," paglalahad ni Dar. Ang nasabing halaga ay bababayaran din sa loob ng limang taon ng walang interes.

"Itong mga pautang na ito ay matatawag nating you-do-business and pay-later-scheme (magnegosyo muna bago magbayad)," ani Dar. Nakikita aniya ng pamahalaan na sa pamamagitan ng mga mga binanggit na programa ay mas mahihikayat ang mga kabataan na bumaling sa agrikultura.

Batay sa isang pag-aaral na inilathala ng Philippine Institute for Development Studies noong Nobyembre 2017, halos 75 porsyento ng mga manggagawa sa agrikultura sa bansa ay nabibilang sa nakatatanda, o age bracket na 55-64 at 25-54 taong gulang. (VND/PIA MIMAROPA/ Occ Min)

More San Francisco News

Access More

Sign up for San Francisco News

a daily newsletter full of things to discuss over drinks.and the great thing is that it's on the house!